ប៉េកាំង៖ ក្រុមទិញលក់ទំនិញអនឡាញដ៏ធំរបស់ចិន Alibaba បានចុះអនុស្សារណៈនៃការយោគយល់ជាមួយក្រសួងពាណិជ្ជកម្មកម្ពុជាក្នុងការនាំយកផលិតផលពីប្រទេសកម្ពុជាដាក់លើវេបសាយខ្លួនក្នុងទីផ្សារប្រទេសចិន និងតំបន់អាស៊ាន ខណៈនាយករដ្ឋមន្ត្រីកម្ពុជាមានសុទិដ្ឋិនិយមថា សហគ្រិនកម្ពុជា នឹងប្រើប្រាស់ថ្នាលពាណិជ្ជកម្មតាម Alibaba ដើម្បីទាញយកប្រយោជន៍ពីទីផ្សារអន្តរជាតិឱ្យបានច្រើនតាមលទ្ធភាពដែលអាចទទួលបាន។

ក្រុមហ៊ុន Alibaba បានចុះ MOU ជាមួយក្រសួងពាណិជ្ជកម្មកម្ពុជានៅរសៀលថ្ងៃទី១៧ ខែតុលា ឆ្នាំ២០២៣ ដោយសម្ដេចធិបតី ហ៊ុន ម៉ាណែត បានអញ្ជើញជាសាក្សីផងដែរនៅទីក្រុងប៉េកាំង សាធារណរដ្ឋប្រជាមានិតចិន។

ក្នុងជំនួបជាមួយសម្ដេចធិបតីក្នុងឱកាសចូលរួមក្នុងវេទិការខ្សែក្រវ៉ាត់ និងផ្លូវលើកទី៣ ប្រធានផ្នែកកិច្ចការសាធារណៈ Alibaba Group លោកស្រី វិន ជែ (WEN Jia) បានថ្លែងអំណរគុណចំពោះ សម្តេចធិបតី ហ៊ុន ម៉ាណែត ដែលបានឆ្លៀតពេលវេលាចូលរួមជាអធិបតីក្នុងពិធីចុះហត្ថលេខា និងបានបញ្ជាក់បន្ថែមទៀតថា គម្រោងនៃការចុះ MOU នេះបានទទួលការគាំទ្រផងដែរពីសំណាក់ សម្តេចតេជោ ហ៊ុន សែន ក្នុងរយៈកាលកន្លងមក ហើយសមិទ្ធផលនេះ ក៏មានលក្ខណៈស្របទៅនឹងកោណនៃសេដ្ឋកិច្ចឌីជីថល នៅក្នុងយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា នៃអាណត្តិទី៧។

លោកស្រី វិន ជែ គូសបញ្ជាក់ថា ក្រុមហ៊ុនក៏មានថ្នាលតាមប្រព័ន្ធអេឡិចត្រូនិកសម្រាប់ប្រជាជនចិនប្រើប្រាស់ ក្នុងការស្នើសុំទិដ្ឋាការកម្ពុជាផងដែរ ហើយសេវាកម្មនេះទទួលបាននូវចំណាប់អារម្មណ៍ខ្ពស់ និងមានចំនួនអ្នកស្នើសុំកើនទ្បើងគួរឱ្យកត់សម្គាល់ខ្លាំង។

សម្តេចធិបតី ហ៊ុន ម៉ាណែត បានសម្តែងនូវក្តីសប្បាយរីករាយ និងការស្វាគមន៍គាំទ្រដល់ក្រុមហ៊ុន Alibaba ដែលបានចូលរួមក្នុងកិច្ចសហប្រតិបត្តិការជាមួយក្រុមហ៊ុន-សហគ្រាស ព្រមទាំងក្រសួង-ស្ថាប័នពាក់ព័ន្ធរបស់កម្ពុជា តាមរយៈការនាំយកផលិតផល និងសេវាកម្មកម្ពុជា ទៅកាន់ទីផ្សារពិភពលោក ហើយសម្ដេចក៏មានសុទិដ្ឋិនិយមផងដែរថា សហគ្រិនកម្ពុជា នឹងប្រើប្រាស់ថ្នាលពាណិជ្ជកម្មតាមប្រព័ន្ធអេឡិចត្រូនិក Alibaba ដើម្បីទាញយកប្រយោជន៍ពីទីផ្សារអន្តរជាតិ ឱ្យបានជាអតិបរមា។

ក្រុមហ៊ុន Alibaba ដោយបច្ចុប្បន្ននេះ មានអតិថិជនសរុបចំនួនប្រមាណ ១ ៣០០លាននាក់ នៅទូទាំងសកលលោក ហើយក្រុមហ៊ុនក៏បានដាក់លក់ផងដែរនូវផលិតផលកម្ពុជានៅលើថ្នាលពាណិជ្ជកម្មតាមប្រព័ន្ធអេឡិចត្រូនិករបស់ខ្លួន ដូចជា អង្ករ និងផ្លែមានជាដើម៕